عزبة التهتهاوي ..للشاعر احمد سعد - أكتب بنفسك - المنطقة المحررة | شباب 6 أبريل
وعيت على الدنيا لقيتني عزباوي
واكمني عزباوي لازم اكون غلباوي
ما هوه ده طبع كل العزباويه
صحيح القلب خايف
بس اللسان براوي
صحيح بنهاود الطغيان
وبنداري جنب الحيطان
لكننا زي البركان
يحسبنا الجهال في خمول
مع اننا بنفور غليان
بنكتم نارنا جوانا
وجوانا مليون لسان
وكل لسان معبي من بختنا ألوان
أحمر بلون الدم
وأسود بلون السخام
أخضر بلون عزبتنا
وأبيض بلون الحمام
وكل لسان مداري تحت منه كلام
وغصن زيتون مكسور ....
وكف مقبوض غضبان
***
وعيت على الدنيا لقيتني عزباوي
ولقيت عزبتنا كبيره ، اكبر عزب الزمام
جميله وجمالها يعجب الحكام
وكل كداب بيزورها بينحنيلها احترام
ويحلف بحكمة كبيره الحاج التهتهاوي
والحاج التهتهاوي كان عرة الحكام
بيتهته في الكلام
ومكشر على الدوام
جلاب مصايب وخايب
ومسلط علينا نسوانه
في العزبه عنتر زمانه
سانن نيابه وسنانه
وبره ينبوع حنان
وحمامة سلام
يقولوله اضرب ياتهتهاوي
يتقلب ديب سحلاوي
يقولوله غمض ياتهتهاوي
يشد اللحاف وينام
وكل حاجه ف عزبتنا
عليها اسم التهتهاوي
المدرسه والمستشفى
والكباري والقهاوي
حتى أبراج الحمام
والزرايب والأجران
والمساقي والسواقي
والشوارع والغيطان
حتى العيال ......
مكتوب على جبينهم
نعم للتهتهاوي
***
وعيت على الدنيا لقيتني عزباوي
ولقيت الخير في عزبتنا ملهش حصر
لكن لقيت الفقر بيعصر ف الغلابه عصر
وكل ألفين عشه مرصود فوقيهم قصر
وناس تقوم من الفجريه وناس تقوم العصر
وناس تشيل الهزيمه وناس تقش النصر
ولقيت القهر كاسر ارادة نفوسنا كسر
والعتمه غطت قلوبنا لما استسلمت للأسر
وصاروا العزباويه تماثيل بشر بلا روس
ادي اللي جابوا السكوت والخوف من الطغيان
بقينا فرقة عرايس بتحركها التيوس
ده اللي يرضى الهوان لا يمكن يكون انسان
وفي ليله صافيه لمحت طاقة نور
لمست فيها أمل يجبر غدنا المكسور
بس الأمل بيعاني من فجور الجور
مسجون بأمر التهتهاوي علشان جريمه زور
!!!
ياتهتهاوي اختشي وافهم ولو مره
ازاي هتسجن أملنا وهوه كلمته حره
طالع من ضهر حر وبطن طاهره حره !
والحر صوته بيتسمع لو من ورا مية سور
والحر مهما يتظلم لا ينحني ولا يشكي
ولا تنكسر عينه ولا يبطل غناوي
بس بيرفع كفوفه للسما ويبكي
ويسلم امره لربه ورب التهتاوي
***
وعيت على الدنيا لقيتني عزباوي
ولقيت الديابه سارحه في كل عزبتنا
بتبور أرضنا وتنهش عرضنا وتنتهك حرمتنا
ولقيت سيوف متسلطه على حروف كلمتنا
ومعاول هدد متعلقه في الهوا ...
علشان لو اتقدمنا تنزل تعترض سكتنا
ولو ف يوم فكرنا تهد في لحظه فكرتنا
اااااااااه ياعقول ضيقه بالصدفه حكمتنا
خيبتكم طلعت تقيله وتفوق على خيبتنا
ياجهله ياللي ماشفتش جهلكم في حد
هي الكلمه بتموت ولا الفكره بتتهد ؟
لو كنتوا فاكرين كده .. يبقى طريقكم سد
وقربت خلاص نهايتكم وقربت بدايتنا
ولقيت ف عزبتنا عيل بمريله ريال
مترفه ومتغندر .. مش زي باقي العيال
لا عمره لعب في الطينه ولا حتى شد حبال
ولا وقف مره في طابور يتستنى لقمه حلال
ولا داس برجله ف غيط ..للهم عمره ما شال
ننوس عيون أمه في عزبة أبوه شغال
أصلا ماعاشي فيها ، طول عمره كان رحال
كان جميل وطويل وهوه اسمه .... ؟
ولا بلاش أحسن .. مش كل الكلام يتقال
قوم لما كبر الحيله بقينا ع الخاطر والبال
وفجأه لقيته بيزورنا عماال على بطاااال
يفتح هنا مشروع وهناك يرسم امال
ويمسح دموع العجايز ويطبطب على العيال
ويقول لدي ياأمي ويقول لده ياخال
ايه اللي جد يابن التهتهاوي وغير الأحوال ؟!
بصيت لأمي بصتلي وبسرعه جاوبت ع السؤال
قالتلي بعد التهتهاوي هيورثنا ضناه في الحال
شمرت كمي وقلت لأمي على جثتي ده محال
ده احنا بشر أحرار لا احنا عبيد ولا مال
كده ياأمي ماعدش فيها سكوت
ده السكوت أس البلاوي
كده هصرخ بأعلى صوت
مايحكمشي ياتهتهاوي
مايحكمشي ياتهتهاوي
مايحكمشي ياتهتهاوى
وعيت على الدنيا لقيتني عزباوي
واكمني عزباوي لازم اكون غلباوي
ما هوه ده طبع كل العزباويه
صحيح القلب خايف
بس اللسان براوي
صحيح بنهاود الطغيان
وبنداري جنب الحيطان
لكننا زي البركان
يحسبنا الجهال في خمول
مع اننا بنفور غليان
بنكتم نارنا جوانا
وجوانا مليون لسان
وكل لسان معبي من بختنا ألوان
أحمر بلون الدم
وأسود بلون السخام
أخضر بلون عزبتنا
وأبيض بلون الحمام
وكل لسان مداري تحت منه كلام
وغصن زيتون مكسور ....
وكف مقبوض غضبان
***
وعيت على الدنيا لقيتني عزباوي
ولقيت عزبتنا كبيره ، اكبر عزب الزمام
جميله وجمالها يعجب الحكام
وكل كداب بيزورها بينحنيلها احترام
ويحلف بحكمة كبيره الحاج التهتهاوي
والحاج التهتهاوي كان عرة الحكام
بيتهته في الكلام
ومكشر على الدوام
جلاب مصايب وخايب
ومسلط علينا نسوانه
في العزبه عنتر زمانه
سانن نيابه وسنانه
وبره ينبوع حنان
وحمامة سلام
يقولوله اضرب ياتهتهاوي
يتقلب ديب سحلاوي
يقولوله غمض ياتهتهاوي
يشد اللحاف وينام
وكل حاجه ف عزبتنا
عليها اسم التهتهاوي
المدرسه والمستشفى
والكباري والقهاوي
حتى أبراج الحمام
والزرايب والأجران
والمساقي والسواقي
والشوارع والغيطان
حتى العيال ......
مكتوب على جبينهم
نعم للتهتهاوي
***
وعيت على الدنيا لقيتني عزباوي
ولقيت الخير في عزبتنا ملهش حصر
لكن لقيت الفقر بيعصر ف الغلابه عصر
وكل ألفين عشه مرصود فوقيهم قصر
وناس تقوم من الفجريه وناس تقوم العصر
وناس تشيل الهزيمه وناس تقش النصر
ولقيت القهر كاسر ارادة نفوسنا كسر
والعتمه غطت قلوبنا لما استسلمت للأسر
وصاروا العزباويه تماثيل بشر بلا روس
ادي اللي جابوا السكوت والخوف من الطغيان
بقينا فرقة عرايس بتحركها التيوس
ده اللي يرضى الهوان لا يمكن يكون انسان
وفي ليله صافيه لمحت طاقة نور
لمست فيها أمل يجبر غدنا المكسور
بس الأمل بيعاني من فجور الجور
مسجون بأمر التهتهاوي علشان جريمه زور
!!!
ياتهتهاوي اختشي وافهم ولو مره
ازاي هتسجن أملنا وهوه كلمته حره
طالع من ضهر حر وبطن طاهره حره !
والحر صوته بيتسمع لو من ورا مية سور
والحر مهما يتظلم لا ينحني ولا يشكي
ولا تنكسر عينه ولا يبطل غناوي
بس بيرفع كفوفه للسما ويبكي
ويسلم امره لربه ورب التهتاوي
***
وعيت على الدنيا لقيتني عزباوي
ولقيت الديابه سارحه في كل عزبتنا
بتبور أرضنا وتنهش عرضنا وتنتهك حرمتنا
ولقيت سيوف متسلطه على حروف كلمتنا
ومعاول هدد متعلقه في الهوا ...
علشان لو اتقدمنا تنزل تعترض سكتنا
ولو ف يوم فكرنا تهد في لحظه فكرتنا
اااااااااه ياعقول ضيقه بالصدفه حكمتنا
خيبتكم طلعت تقيله وتفوق على خيبتنا
ياجهله ياللي ماشفتش جهلكم في حد
هي الكلمه بتموت ولا الفكره بتتهد ؟
لو كنتوا فاكرين كده .. يبقى طريقكم سد
وقربت خلاص نهايتكم وقربت بدايتنا
ولقيت ف عزبتنا عيل بمريله ريال
مترفه ومتغندر .. مش زي باقي العيال
لا عمره لعب في الطينه ولا حتى شد حبال
ولا وقف مره في طابور يتستنى لقمه حلال
ولا داس برجله ف غيط ..للهم عمره ما شال
ننوس عيون أمه في عزبة أبوه شغال
أصلا ماعاشي فيها ، طول عمره كان رحال
كان جميل وطويل وهوه اسمه .... ؟
ولا بلاش أحسن .. مش كل الكلام يتقال
قوم لما كبر الحيله بقينا ع الخاطر والبال
وفجأه لقيته بيزورنا عماال على بطاااال
يفتح هنا مشروع وهناك يرسم امال
ويمسح دموع العجايز ويطبطب على العيال
ويقول لدي ياأمي ويقول لده ياخال
ايه اللي جد يابن التهتهاوي وغير الأحوال ؟!
بصيت لأمي بصتلي وبسرعه جاوبت ع السؤال
قالتلي بعد التهتهاوي هيورثنا ضناه في الحال
شمرت كمي وقلت لأمي على جثتي ده محال
ده احنا بشر أحرار لا احنا عبيد ولا مال
كده ياأمي ماعدش فيها سكوت
ده السكوت أس البلاوي
كده هصرخ بأعلى صوت
مايحكمشي ياتهتهاوي
مايحكمشي ياتهتهاوي
مايحكمشي ياتهتهاوى
ليست هناك تعليقات:
إرسال تعليق